El grupu municipal d'Unidá Nacionalista Asturiana-Andecha Carreño opónse a la Planta de Ciclu Combináu proyectada nel Puertu del Musel

NOTA DE PRENSA

El grupu municipal d'Unidá Nacionalista Asturiana-Andecha Carreño presentó fai unos díes una ventena d’alegaciones a la “Evaluación d'Impactu Ambiental” del proyectu de construcción de la planta de producción enerxética a base de gas.
El proyectu de la planta enerxética supondrá una nueva vuelta de tuerca na grave situación medioambiental que padez el conceyu de Carreño. El Gobiernu Asturianu, cola complicidá del Ayuntamientu de Carreño nun fai más qu’aumentar la concentración d’actividaes contaminantes y peligroses nel perímetru industrial de Carreño, empeorando la calidá del aire y de vida de los vecinos del Conceyu hasta llímites insoportables.
Unidá Nacionalista Asturiana-Andecha Carreño presentó delles alegaciones a la escontra de la “Evaluación d'Impactu Ambiental” de la planta de ciclu combinao coles argumentaciones que se resumen darréu:
- La zona onde se pretende situar, nuna esplanada ganada al mar n’Aboño, nun tá nel conceyu de Xixón, como diz l’informe, sinón nuna llende ente los conceyos de Xixón y Carreño, pendiente de demarcación, desllinde y amojonamiento.
- El proyectu nun tá xustificao dende’l puntu de vista del autoabastecimientu enerxéticu porque Asturies ye excedentaria en producción enerxética esportando dos tercios de lo que produz.
- Amás, la Planificación de los Sectores d'Electricidá y Gas 2008-2016 realizada pol “Ministeriu d'Industria, Turismu y Comercio”, a través de la “Secretaría Xeneral d'Enerxía” (“Subdireición Xeneral de Planificación Enerxética”), establez nel so puntu 3.4.9. Directrices d'ubicación xeográfica y xeneración almisible nel sistema qu'Asturies ye una Comunidá Autónoma de “Baxa Preferencia” pa la nueva xeneración enerxética, argumentando amás que “deben evitase les pérdides de transporte y debe favorecese l’equilibriu ente xeneración y demanda enerxética”.
- El combustible utilizao nes plantes de ciclu combinao ye’l gas, un recursu escaso ya importao principalmente del Magreb, polo que’l proyectu nun fai más qu’aumentar la nuesa dependencia con respeuto a otros países nel campu de los combustibles de producción enerxética.
- El proyectu nun ta xustificao sociu-económicamente: Les centrales de ciclu combinao suponen un volumen d’emplegu que nun suel pasar de les 30-40 persones. Ensin embargu, l’efectu acumulativu industrial na zona, la suma d’emisiones contaminantes a les ya esistentes, les altes temperatures de los vertíos al mar, asina como’l so impactu paisaxístico, tien como consecuencia una perda indiscutible en recursos naturales y polo tanto, n’emplegos direutamente rellacionaos colos mesmos: Turismu, agricultura, ganadería y pesca. Deberíen valorase cuántos de los 1.502 emplegos del sector de l'agricultura y pesca y de los 6.920 del sector de la hostelería de los conceyos de Xixón y Carreño (Reseña estadística de los municipios asturianos. SADEI 2004) veríense afeutaos pola instalación d’una nueva industria contaminante.
- Una nueva industria contaminante, nesti casu una nueva “Central de Ciclu Cambinao de 860 MW” xenerará un aumento de los niveles d'emisión e inmisión nos conceyos de Carreño y Xixón, incrementándose de forma significativo los riesgos pa la salú ente los habitantes de la comaca. Estudios del Institutu de Salú Pública Carlos III del Ministeriu de Sanidá y Consumo coloca la zona central asturiana dientro de les zones con más incidencia d'enfermedaes respiratories y tases de cáncer asociades. Según datos apaecíos nos medios de comunicación proporcionaos pola Sanidá Pública asturiana, l’área sanitaria de Xixón-Carreño, apaecía con elevaos índices de cáncer de pulmón. Añadir nuevos focos d'emisión como’l que se pretende instalar nel Musel, contribuiría a empeorar, ensin dulda, la calidá del aire.
- La nueva central contribuirá a la emisión de contaminantes xeneradores del efectu invernaderu. A pesar de que se repita cansinamente que la producción enerxética con gas ye una producción más “llimpia y eficiente” qu’otres, como por exemplu la del carbón, si nun se piesllen unes pa sustituíles por otres, lo cierto ye que’l resultao global ye un inalmisible aumentu de les emisiones de CO2.
- Los vertíos marinos tienen una temperatura de 7 ºC por encima de la temperatura media del agua del Mar Cantábrico, lo que va provocar un impactu negativu mui seriu sobre los caladeros próximos y les especies marines.
- La ubicación prevista pa la Central de Ciclu Combinao del Musel nun respeta la distancia de 2.000 metros al núcleo más próximo de población agrupada como ye Xibares en Carreño que tará a 1.313 metros y el poblao de Pescadores del Muselín, que tá a 1959 metros, incumpliendo'l Reglamento d'Actividaes Molestas, Insalubres, Nocives y Peligroses, aprobáu pol Decreto 2414/1961 de 30 de noviembre.
- Nun se favoreció'l debate nin la información sobre’l proyectu, pero a pesar d’ello los vecinos mas próximos ya manifestaron delles veces la so oposición al proyectu.
Por toes estes argumentaciones, y dalgunes más, el grupu municipal d’Unidá Nacionalista Asturiana-Andecha Carreño opónse rotundamente a la istalación de la nueva central y se suma al conxunto de movilizaciones que dende los movimientos sociales d’oposición al modelu enerxéticu d’Asturies puedan convocase nos próximos meses.

Grupu municipal d’Unidá Nacionalista Asturiana- Andecha Carreño