martes, 8 de julio de 2008

Valoración UNIDÁ-Andecha Carreño sobre la sentencia de la Gasolinera en Tabaza II

NOTA DE PRENSA DE UNIDÁ-ANDECHA CARREÑO

Anque la sentencia tien que ser estudiada polos servicios xurídicos municipales, quienes valorarán si la recurren ante instancies superiores, dende UNIDÁ-Andecha Carreño creemos que l'actuación del equipu gobiernu non fue correcta, y entendemos que tanto SOGEPSA como PSOE y URAS son responsables d'esta situación, que podría suponer un desembolsu importante pal Ayuntamientu, y en definitiva, pa los vecinos y vecines de Carreño.
Por un llau, entendemos que SOGEPSA ye'l principal responsable d'esta situación, por interpretar de forma errónea les Ordenances de Tabaza II y unviar al Ayuntamientu Carreño un Informe sobre les condiciones d'edificación nesi Polígonu, onde contradiz lo dicho polos informes de los téunicos municipales, tanto del Informe Xurídicu del Secretariu del Ayuntamientu, como del Informe Téunicu-Urbanísticu del Arquiteutu Municipal. Creemos qu'en casu de que l'ayuntamientu Carreño tenga que facer frente a una indemnización a la empresa qu'angüaño esplota la Estación de Serviciu en Tabaza II, sería necesariu valorar dende los téunicos municipales la posibilidá d'entamar contra SOGEPSA un contenciosu polos daños y perxuicios ocasionaos a Carreño.
Dende UNIDÁ-Andecha Carreño somos mui críticos coles actuaciones de SOGEPSA n'Asturies y contra la propia esistencia d'esta sociedá, que ye usada pol PSOE pa espoliar a los vecinos y vecines, na mayor parte pequeños propietarios que son dueños de los terrenos dende fai xeneraciones, aprovechándose del desconocimientu de la llei, y tratándolos sin nengún respetu, con coacciones, amenaces y con total despreciu, de la mesma manera que los blancos trataron a los indios de norteamérica. Les espropiaciones, a les que solo habría que recurrir de forma escepcional y mui xustificada (escueles, hospitales, equipamientos públicos, carreteres, etc), empléguense de manera abusiva polos gobernantes, con actuaciones claramente comparables coles de los rexímenes totalitarios. Actuaciones de SOGEPSA na zona rural de Xixón, el desaloxu forzáu d'una familia con persones d'avanzada edá en La Madalena (Avilés), o les espropiaciones en Bobes (Siero), son claros exemplos de la manera d'actuar d'esta sociedá y del gran rechazu social que provoquen. En Carreño, los vecinos y vecines del entornu de los polígonos industriales de La Granda y Tabaza tamién conocen esta manera d'actuar.
Por otru llau, son tamién claros responsables los grupos políticos de PSOE y URAS, que votaron en contra del alcuerdu mayoritariu de la Comisión d'Urbanismu onde tan representaos tolos grupos políticos y que rechazaron la istalación de la gasolinera, y que votaron en contra de los informes iniciales de los téunicos municipales, que yeren desfavorables.

Grupu Políticu d'UNIDA-Andecha Carreño

No hay comentarios:

Publicar un comentario

NO SE PUBLICARAN LOS COMENTARIOS QUE NO SE AJUSTEN A LAS NORMAS DEL BLOG.

.

.