Comunicado de UNA-BA

MUNCHES GRACIES POR ESTROZAR LA BARAGAÑA

Paecía imposible pero va conseguilo. Hai que tener en cuenta que nun yera pionera de nada. Los sos antecesores dexaren la vara mui alta. Diba ser difícil meyoralo. Pero Melania Álvarez, la conceyala d’Urbanismu del Ayuntamientu de Carreño, ‘es una chica muy capaz’.
Propúnxose nun pasar pel cargu desapercibida. Tenía que facer algo grande. Como los sos predecesores na poltrona. Sí, los mesmos que tiraron la fábrica d’Ojeda, permitieron construyir el Marsol, o dieron el preste, añu tras añu, el estermín progresivu y continuu de tola arquitectura tradicional del pueblu.
Nun foi abondo con promover un planeamientu urbanísticu que torna Candás nuna ciudá dormitoriu de ladrillu y formigón. Non. Facía falta algo más, algún golpe d’efectu que quedara na retina de la historia candasina. Y entós propúsose remodelar, o estrozar, La Plaza de la Baragaña.
Yera mui fuerte empezar de golpe. Facía falta un precalentamientu. Y fízolo cola plazina de la cai la Estrecha. La fontina que-y daba presencia y carácter clásicu al espaciu, pensábamos que nun molestaba a naide. Pero molestába-y a ella. Y punxo enriba una tarta de cementu que nun aporta nada, namás que vergüenza a los vecinos cuando pasamos per ellí delantre.
El parque de Valdés Pumarino, popularmente conocíu como Parque de Bocata, foi la segunda víctima. Un espaciu de recréu y descansu sustituyóse por un vacíu, una muria de formigón y unes escaleres.
Y agora, tenemos la nueva Plaza de la Baragaña. Otru espaciu vacíu y desiertu, bordiáu por muries de formigón, sin nengún atractivu estéticu, sin nenguna vida, y a años lluz de lo que tien que ser el centru neurálxicu d'un pueblu. Por cierto, la muria que bordiaba’l llugar pela zona baxa, la que daba a la cai Braulio Busto, yá nun existe. Yera una paré fecha hai munchos años artesanalmente por Manolo ‘El Gallego', maestru canteru que pulió y colocó les piedres de mampostería que-y daben el so peculiar aspecto. La conceyala nun tuvo piedá nin con eso.
Manolo 'El Gallego', desgraciadamente yá nun pue llevantar la cabeza y opinar sobre lo que ficieron cola so obra. Pero UNA Carreño sí. Y eso ficimos. Pidimos, ya nel primer aconceyamientu, que los vecinos y vecines entraren a valorar el proyeutu y a proponer qué tipu d'obra queríen facer na Baragaña. Y tamién pidimos que'l proyeutu respetara la identidá, la estética y se mantuvieren los usos actuales. Pero too foi igual. La mayoría del Ayuntamientu yá tenía dictada la so sentencia de muerte sobre la emblemática plaza candasina.
Nun sabemos si Melania Álvarez ye la peor conceyala urbanística de la historia democrática d'esti Conceyu. Pero si nun lo ye, cerca andará.
Gracies Melania.

OTRU AIRE PA CARREÑO VOTA UNA-Bloque por Asturies